वर्धा दिनांक 24 डिसेंबर (प्रतिनिधी)
वैद्यकीय चाचण्यांसाठी सेवाग्राम येथील कस्तूरबा रुग्णालयात एमआरआय कक्षात गेलेल्या महिलेच्या बॅगमधील दागिने आणि रोख रक्कम अज्ञात महिलेने चोरुन नेल्याची घटना घडली आहे. विशेष म्हणजे चोरी करण्यासाठी महिलेने लहान मुलीचाही वापर केला आहे.
सुलोचना श्याम नंदाने ही महिला कस्तुरबा हॉस्पिटल सेवाग्राम येथे गंभीर आजाराच्या उपचारासाठी गेली होती. त्यावेळी तिला डॉक्टरांनी एमआरआय करण्यासाठी पाठविले असता तिने खोलीच्या बाहेरच अंगावरील दागिने काढून बॅगमध्ये ठेवले. ती बॅग भाऊ संजय मांढरे यांच्याकडे देऊन डॉक्टरांनी सांगितलेल्या चाचण्याच्या तपासणीसाठी गेली.
एमआरआय स्कॅन करुन बाहेर आली असता बॅगमध्ये तिला दागिने सापडले नाही. चोरट्याने सोन्याचे दागिने, सोन्याचे मणी- डोरले, मंगळसूत्र तसेच कानातले आणि ४ हजार रुपये रोख असा एकूण ३१ हजार रुपयांचा ऐवज चोरुन नेलेला दिसून आला. त्यांनी याप्रकरणी लगेच सेवाग्राम ठाणे गाठून याबाबतची तक्रार दिली.
चोरट्या महिलेने तिच्यासोबत असलेल्या लहान मुलीच्या मदतीने मोठ्या शिताफीने सुलोचना यांच्या बॅगमधून दागिने आणि रोख रक्कम काढून घेत पळ काढला. चोरट्या महिलेने तोंडावर रुमाल बांधलेला होता तसेच तिच्यासोबत एक लहान मुलगी देखील होती. या चोरीचा थरार रुग्णालयातील सीसीटीव्हीत कैद झाला आहे. या प्रकरणी पोलिस अधिक तपास करत आहेत.
