गर्ल्स इस्लामिक फाउंडेशन या जमाते- ए – इस्लामी हिंद (नॉर्थ वेस्ट) गटाने नागपूरमध्ये, ज्या ठिकाणी बाराही महीने पोलिस बंदोबस्त असतो, अशा माजी मुख्यमंत्र्यांच्या बंगल्याच्या परिसरात, भररस्त्यात दिवसा ढवळ्या हिंदू महिला व अज्ञान मुलीना धाक दाखवून जबरदस्तीने हिजाब घालण्यास बाध्य करण्याचा प्रयत्न 4 सप्टेंबर रोजी करण्यात आला. हिजाब घातलेल्या साधारण दहा ते पंधरा महिला व काही अंतरावर तेव्हढेच पुरुष एकत्रित येऊन अशा प्रकारचे कायदाविरोधी कृत्य संघटितपणे करत होते. हिंदू महिला व मुलीनी या अमानवी कृत्याला विरोध केल्यानंतर त्यांना धमक्याही देण्यात आल्या. परंतु काही पादचाऱ्यांनी प्रसंगावधान दाखवल्याने पुढील अनर्थ टळला व त्या हिजाब घातलेल्या महिला व पुरुष तेथून पसार झाले असल्याचे दरेकर यांनी पत्रात नमूद केले आहे.
दरेकर म्हणाले, या सर्व घटनेचे विडिओ चित्रीकरण झाले असून संबंधित गुन्हेगार चित्रीकरणात स्पष्टपणे दिसून येत आहे. तसेच या महिलांकडून वाटले जाणारे पॅम्पलेट आणि ज्या वाहनांनी हे सर्व लोकं आले होते त्या वाहनांचे वाहन क्रमांक पादचाऱ्यांनी पोलिसांना सुपूर्द केले आहेत. पादचारी व हिंदू महिलांनी या कायदाविरोधी घटनेची नागपूरमधील सदर पोलीस ठाण्यात तक्रारही नोंदवली आहे. त्यामुळे या गंभीर प्रकरणाची तातडीने दखल घेऊन हे कायदाविरोधी कृत्य करणाऱ्यांविरोधात तातडीने गंभीर स्वरूपाच्या संबंधित कलमांन्वये गुन्हे दाखल करावेत. अटक करावी व कायद्यानुसार शिक्षा होईल अशा प्रकारची कठोर कारवाई करावी तसेच या समाजविघातक कृत्यामागे असलेल्या संघटना व पदाधिकारी यांचाही शोध घेऊन त्यांच्याविरुद्धही अशाच प्रकारची फौजदारी कारवाई करावी, अशी मागणी दरेकर यांनी पत्राद्वारे केली आहे.
