नागपूर दिनांक 4 जनवरी (महानगर प्रतिनिधी)
अनियंत्रित कार झाडावर आदळून झालेल्या भीषण अपघातात सीबीआयचा अधिकारी ठार झाला. ही घटना सिव्हिल लाइन्समधील व्हीसीए चौकात घडली.
हिमांशू उदयसिंग मीना (वय २७, रा. सीपीडब्ल्यूडी कॉलनी, मूळ रा. भरतपूर, राजस्थान) असे मृतकाचे नाव आहे. ते सीबीआयच्या नागपुरातील लाचलुचपत प्रतिबंधक शाखेत कार्यरत होते. गाझियाबाद येथे प्रशिक्षण घेतल्यानंतर अडीच वर्षांपूर्वी त्यांची नागपुरात नियुक्ती करण्यात आली होती.
नागपुरात ते पत्नीसोबत राहायचे. त्यांच्या पत्नी गर्भवती असल्याने काही दिवसांपूर्वी नातेवाइकाकडे गेल्या होत्या. सोमवारी पहाटे मीना हे कारने (एमएच-३१-एफआर-८७४१) व्हीसीए चौकाकडून लिबर्टी टॉकीज चौकाकडे जात होते. त्याचदरम्यान मीना यांचे कारवरील नियंत्रण सुटल्याने व कारचा वेग अधिक असल्याने कार झाडावर आदळली.
हा अपघात इतका जबर होता की त्यात ते गंभीर जखमी झाले. अपघाताची घटना घडल्यानंतर पोलिस लगेचच घटनास्थळी दाखल झाले होते. त्यांनी तात्काळ हिमांशू यांना उपचारांसाठी रुग्णालयात दाखल केले. मात्र, उपचारादरम्यान त्यांचा मृत्यू झाला. हिमांशू यांच्या मृत्यूच्या घटनेची माहिती मिळताच सारेच हळहळले आहेत.
