नागपूर, दि. 28: कोरोनावर मात करण्यासाठी राबविण्यात येत असलेल्या लसीकरण मोहिमेत ग्रामीण भागातील जनतेने घेतलेल्या उत्स्फूर्त सहभागामुळे जिल्ह्यात 10 लाख 9 हजार 358 नागरिकांचे लसीकरण पूर्ण झाले असल्याची माहिती जिल्हा परिषदेचे मुख्य कार्यकारी अधिकारी योगेश कुंभेजकर यांनी दिली.
लसीकरण मोहिमेसाठी जिल्हा प्रशासनातर्फे ग्रामीण भागात विविध विभागांच्या समन्वयातून विशेष प्रयत्न सुरु असून यासाठी स्थानिक लोकप्रतिनिधी व अधिकारी – कर्मचारी यांच्या प्रयत्नामुळे या मोहिमेला गती मिळाली आहे. 10 लाख लसीकरणामध्ये 7 लाख 86 हजार 879 नागरिकांनी पहिला डोस घेतला असून 2 लाख 22 हजार 479 नागरिकांनी दुसरा डोस घेतला आहे.
लसीकरणासाठी ग्रामीण भागात प्राथमिक आरोग्य केंद्र, उपकेंद्र तसेच ग्रामपंचायत स्तरावर लसीकरण केंद्र सुरु करण्यात आली आहेत. या लसीकरणामध्ये शासकीय लसीकरण केंद्रावर 9 लाख 54 हजार 140 नागरिकांनी तर खासगी लसीकरण केंद्रांवर 55 हजार 218 नागरिकांनी पहिला व दुसरा डोस घेतला आहे.
तालुकानिहाय झालेल्या लसीकरणामध्ये भिवापूर 40 हजार 717, हिंगणा 1 लाख 9 हजार 947, कळमेश्वर 67 हजार 096, कामठी 1 लाख 6 हजार 669, काटोल 76 हजार 701, कुही 45 हजार 976, मौदा 59 हजार 357, नागपूर ग्रामीण 1 लाख 21 हजार 678, नरखेड 60 हजार 976, पारशिवनी 66 हजार 209, रामटेक 51 हजार 896, तर सावनेर तालुक्यात 1 लाख 1 हजार 182 तसेच उमरेड तालुक्यातील नागरिकांचे पहिल्या व दुसऱ्या डोसचे 1 लाख 954 लसीकरण पूर्ण झाले आहे.
