नागपूर दिनांक 24 जानेवारी (प्रतिनिधी)
प्रजासत्ताकदिनाच्या संचलनात सहभागी होणारा महाराष्ट्राच्या जैवविविधतेवर आधारित चित्ररथ तयार झाला आहे. नागपूर-विदर्भातील तरुण कलावंतांनी हे काम पूर्णत्वास नेले आहे.
या चित्ररथाची संकल्पना सांस्कृतिक कार्य विभागाच्या सहसंचालक मीनल जोगळेकर यांची असून निर्मिती संचालक बिभीषण चावरे आहेत. नागपूरच्या शुभ अॅड्स कंपनीला हा चित्ररथ तयार करण्याची जबाबदारी देण्यात आली होती. कंपनीचे व्यवस्थापकीय संचालक नरेश चरडे आणि पंकज इंगळे यांच्या नेतृत्वात इतर कलाकारांनी या चित्ररथाला आकर्षक स्वरूप दिले आहे. यावर्षी प्रजासत्ताकदिनाला विविध २१ चित्ररथ राहतील. महाराष्ट्राचा जैवविविधतेवरील चित्ररथ साकारणारे अनेक कलावंत हे अत्यंत तरुण आहेत. नागपूरच्या शासकीय चित्रकला महाविद्यालयातून शिक्षण घेतलेले आणि विदर्भाच्या विविध भागांतील हे तरुण आहेत.
या कलावंतांनी तयार केलेल्या कलाकृतींमध्ये विविध प्रकारांचा समावेश आहे. खार, सरडा आणि महाकाय फुलपाखरू धातूपासून बनविण्यात आले आहेत. विविध शिल्पाकृतींचाही यामध्ये समावेश आहे. याशिवाय, या कलाकृतींचे आकर्षक रंगकामही याच तरुण कलावंतांनी केले आहे. या चित्ररथ निर्मितीमुळे नागपूर-विदर्भातील कलावंतांना राष्ट्रीय स्तरावरील काम करण्याची संधी मिळाली आहे.
